લંડનથી ભણીને આવીને ભારતમાં શરૂ કર્યો અથાણાં વેંચવાનો બિઝનેસ, આજે કરે છે કરોડોનુ ટર્નઓવર

Story

કહેવાય છે કે કોઈ ધંધો નાનો કે મોટો નથી હોતો. વ્યક્તિ પોતાની મહેનતથી કોઈપણ નાની વસ્તુને મોટી બનાવી શકે છે. દિલ્હીમાં ઉછરેલી નિહારિકા ભાર્ગવની વાર્તા પણ આવી જ છે. તેણે માત્ર તેના પિતાના અથાણાં બનાવવાના શોખને વ્યવસાયમાં ફેરવ્યો એટલું જ નહીં, માત્ર ત્રણ વર્ષમાં તેણે એક કરોડ રૂપિયા સુધી ટર્નઓવર પહોંચાડ્યું.

લંડનથી માર્કેટિંગ સ્ટ્રેટેજી અને ઇનોવેશનમાં માસ્ટર્સ કરનાર નિહારિકાએ ભાગ્યે જ કલ્પના કરી હશે કે તે અથાણું બનાવશે. એક અહેવાલ મુજબ 2015 માં લંડનથી ભારત પરત ફરેલી નિહારિકાને નોકરી શોધવામાં કોઈ સમસ્યાનો સામનો કરવો પડ્યો ન હતો. ગુડગાંવની એક બહુરાષ્ટ્રીય કંપનીએ તેમને નોકરીની ઓફર કરી હતી, જેમાં તેઓ જોડાયા હતા.

જોકે, નિહારિકા વધુ સમય સુધી નોકરી ન કરી શકી. ખરેખર તેના મગજમાં કંઈક બીજું જ ચાલી રહ્યું હતું. તે તેના પોતાના બિઝનેસ વિશે વિચારતી હતી. આ દરમિયાન, એક દિવસ જ્યારે તેણે તેના પિતાને અથાણું બનાવતા જોયા, ત્યારે તેણે તેને વાતચીતમાં કહ્યું કે પપ્પા તમે આનો બિઝનેસ કેમ શરૂ નથી કરતા.

પિતાએ હસીને વાત ટાળી. પણ આ વિચાર નિહારિકાને ક્લિક થઈ ગયો. નિહારિકાએ અથાણાના બજાર પર સંશોધન શરૂ કર્યું અને નક્કી કર્યું કે તે તેના પિતાના શોખને વ્યવસાયમાં પરિવર્તિત કરશે. શરૂઆતમા આ દીકરી તેના પિતાના હાથથી બનાવેલા અથાણાંને દિલ્હી અને તેની આસપાસના પ્રદર્શનમાં લઈ ગઈ.

ત્યાંથી સારો પ્રતિસાદ મળતા જ નિહારિકાએ તેનું અથાણું લોકલ માર્કેટમાં ઉતાર્યું. ધીરે ધીરે કામ આગળ વધતું ગયું તો તેણે મધ્યપ્રદેશના ખજુરાહોમાં તેની ખાલી પડેલી જમીન પર અથાણાંમાં વપરાતી તમામ પ્રોડક્ટ્સ ઉગાડવાનું શરૂ કર્યું. નિહારિકાના આ પગલાથી તેને ઘણો ફાયદો થયો.

ટૂંક સમયમાં જ તેનો ધંધો શરૂ થઈ ગયો. વર્ષ 2017 માં તેણે ગુડગાંવમાં ‘ધ લિટલ ફાર્મ’ નામની કંપની ખોલી. આજે લગભગ ત્રણ વર્ષ પછી તે એક કરોડ રૂપિયાનું ટર્નઓવર કરે છે. તે 50 થી વધુ જાતોના અથાણાં વેચે છે. જેમાં તેની ટીમના 15-20 લોકો તેને મદદ કરે છે, જેમા દસ મહિલાઓ પણ છે. નિહારિકા કહે છે કે દ્રઢ ઈચ્છાશક્તિથી વ્યક્તિ કંઈ પણ હાંસલ કરી શકે છે.

Leave a Reply

Your email address will not be published.